សៀមរាប៖ នាយករដ្ឋមន្ត្រី សម្តេចធិបតី ហ៊ុន ម៉ាណែត បានថ្លែងថា បញ្ញាសិប្បនិម្មិត AI បង្ហាញពីឱកាសដែលមិនធ្លាប់មានពីមុនមកសម្រាប់កំណើនសេដ្ឋកិច្ច នវានុវត្តន៍ និង វឌ្ឍនភាពសង្គមនៅក្នុងតំបន់ ដោយថានៅក្នុងយុគសម័យមួយដែលបានកំណត់ដោយបច្ចេកវិទ្យាឈានមុខដែលរីកចម្រើន យ៉ាងឆាប់រហ័ស ការធ្វើសមាហរណកម្មបញ្ញាសិប្បនិម្មិត ទៅក្នុងសង្គមរបស់យើងមានការ ជាប់ពាក់ព័ន្ធយ៉ាងជ្រាលជ្រៅសម្រាប់អនាគតរបស់អាស៊ាននិងដៃគូរ។

ថ្លែងក្នុងកិច្ចប្រជុំរដ្ឋមន្ត្រី អាស៊ានផ្នែកវិទ្យា សាស្ត្រ បច្ចេកវិទ្យា និងនវានុវត្តន៍ លើកទី២០ នាព្រឹកថ្ងៃទី០៧ ខែមិថុនា ឆ្នាំ២០២៤ សម្ដេចធិបតី ហ៊ុន ម៉ាណែត បានថ្លែងថា បញ្ញាសិប្បនិម្មិតកំពុង ប្រែក្លាយយ៉ាងឆាប់រហ័សជាផ្នែកដ៏សំខាន់មួយនៃជីវិតរស់នៅដោយវត្តមានរបស់វាបានបង្កប់យ៉ាង ជ្រៅនៅក្នុងទម្លាប់ប្រចាំថ្ងៃរបស់យើង។

សម្ដេចថា៖ «ក្នុងរយៈពេលមួយទសវត្សរ៍កន្លងមកនេះ មានការរីក ចម្រើនគួរឱ្យកត់សម្គាល់នៃបច្ចេកវិទ្យាបញ្ញាសិប្បនិម្មិត ដែលជំរុញដោយ ការប្រមូលផ្តុំទិន្នន័យយ៉ាងច្រើន។ អត្ថប្រយោជន៍របស់វាមានសារៈសំខាន់នៅក្នុងវិស័យជាច្រើន រួមទាំងការ អប់រំ ការថែទាំសុខភាព ធុរកិច្ច ភស្តុភារ ថាមពល សេវាកម្ម កម្មន្តសាល ធនាគារ សន្តិសុខ និងដំណើរការធ្វើការសម្រេចចិត្ដនានា»។

ទោះជាយ៉ាងណាសម្តេចធិបតីបានបង្ហាញពីក្ដីបារម្ភមួយចំនួនរួមមាន ការគិតគូរលើក្រមសីលធម៌ បរិយាបន្ន តម្លាភាព ភាពយុត្តិធម៌ ការព្រួយបារម្ភអំពីឯកជនភាពទិន្នន័យ និងតម្រូវការសម្រាប់ការរៀបចំកម្លាំងពលកម្មឡើងវិញ។

សម្តេចធិបតីនាយករដ្ឋមន្ត្រី បានគូសបញ្ជាក់ថា ការវិវត្តរបស់បញ្ញាសិប្បនិម្មិតមិន អាចបញ្ឈប់បានទេ ហើយក៏មិនអាចបញ្ច្រាស់ទិសដៅរបស់វាបានដែរ។ យ៉ាងណាក៏ដោយ របៀបដែលយើងរៀបចំអប់រំ និងជំនាញដល់ពលរដ្ឋរបស់យើងគឺជាអ្វី ដែលសម្ដេចជឿថាជាមូលដ្ឋានគ្រឹះដើម្បីសម្របខ្លួនយើងទៅនឹងការពិតថ្មីនេះ។

ទន្ទឹមនឹងនោះ ក្ដីកង្វល់ទាក់ទងនឹងការផ្លាស់ប្ដូរការងារដែលមានសក្តានុពល និងបញ្ហាប្រឈមផ្សេងទៀតបានកើតឡើងក្នុងចំណោមសាធារណជន។ វាមានសារៈសំខាន់ណាស់ ក្នុងការទទួលស្គាល់ថាបញ្ញាសិប្បនិម្មិតពិតជាអាចផ្លាស់ប្តូរទិដ្ឋភាពការងារ ប៉ុន្តែវាក៏នាំមក នូវឱកាសថ្មីៗផងដែរ។ តាមពិតទៅ បញ្ញាសិប្បនិម្មិតបានក្លាយជា រឿងទូទៅនៅក្នុងជីវិតរបស់យើង ឧទាហរណ៍ក្នុងកិច្ចការសាមញ្ញៗ ដូចជាការស្វែងរកព័ត៌មាននៅលើស្មាត ហ្វូនជាដើម៕